Mi Bida Nobo Den Kristu
Suzette on Dec 23 2007 at 22:14 | Filed under: Geloof
Si,Un Bida Nobo Den Kristu. Ja ta mas ku un aña ku mi a bolbe serka mi Dios.Mi mester bisa ku nunka Señor a bandona mi ta ami mes dor di sirkumstansianan den mi bida a hala bai for di e bida di Dios. Pero Dios a jama mi bek serka dje i pa mi dedika mi bida kompletamente na dje. Dios ta maravioso i grandi, kambionan grandi el a hasi den mi bida.
Mi tabata tin un bida huntu ku mi partner pa basta tempu kaba pero toch mi tabata ta tin hopi falta di amor, atenshon i hopi mas. Nunka e no tabatin sufisiente tempu pa mi i semper mi mester a hasi kasi tur kos mi so. Komunikashon tabata Sero den nos bida. E kos a jega asina leu ku mi tabata kier a kasa kune pa wak ku asina porta kos lo drecha, pero Dios a papia ku mi pa medio di su spiritu santu. Dios a mustra mi un biaha kaba ku mi mester a laga e partner aki pero pa motibunan di materialismo i desobedensia na Señor mi a keda kune. Mi tabata tin miedu di a lage paso mi tabata sa tur loke el a pasa den su bida i tambe e tabata tata di mi jui. Esei tampoko no ta bon paso mi tabata biba un bida p’e i mi no tabata wak pa mi mes. E di dos biaha ku Señor a papia ku mi atrobe pa mi laga mi partner mi a bai profundo den orashon pa Dios mustra mi e lokual ku di berdat e kier pa mi hasi. Mi tabata tin hopi gana di kasa paso mi tabata sa ku un bida biba no ta segun Dios su mandamentu. Dios a papia ku mi hopi pa medio di su palabranan i esun ku mas a toka mi kurason tabata Jeremias 29:11 ku ta bisa asina’ki: T’ami so konosé e plannan ku Mi tin pa boso; Mi ta sigurá boso ku Mi ke boso felisidat, no boso desgrasia; Mi ta primintí boso un futuro yen di speransa.
Wel di berdat Dios tabata tin su plan traha kaba pa mi bida. Mi a laga mi partner i asina Dios a kuminsa habri portanan den mi bida. Ja for di prome ku mi a laga mi partner Dios tabata tin esun perfekto pa mi kaba reserva un banda. Mi a sigui den mi mundu i mi tabata hasi tur loke mi tabata tin gana di hasi e tempu ei sin sa e plan ku Dios tin pa mi bida. Dios a sigui mustra mi kosnan ku mi mester a saka i kita for di den mi bida i asina mi a hasi tambe. Problemanan a bini, hopi momentunan difisil, pero esakinan tur tabata pruebanan ku Dios a pone pa mi por hala mas serka dje. Mi tabata pone mi konfiansa den Hende mas ku den Dios te na momentu ku mi a eksperensia ku Hende semper ta laga bo na kaya. E hende semper ta buska algu ku bo tin pa e mes. Pero Dios semper ta duna bo loke bo tin mester i nunka ta laga bo desampara. Esaki su palabra mes ta bisa den Isaías 41:10; No tene miedu pasobra Mi ta ku bo ; no wak asina spantá, pasobra Ami ta bo Dios. Mi ta duna bo forsa, yuda bo, sostene bo ku mi man viktorioso.
Mi kier enkurasha kada un ku lesa e testimonio aki si bo ta pasando den e mesun situashon aki mi kier bisa bo ku Señor kier yuda bo, pero ta abo mes mester tuma e prome paso i E lo sigui hasi sobra. Pa hasi e historia largu aki kortiku, awor mi tin un bida kompletamente renoba den Kristu Hesus. Mi a kasa i mi a nase di nobo. Mi ta hopi felis i mi kasa tin hopi tempu pa su kas di famia i nos ta biba segun Dios su mandamentunan.
Mi kier bisa bo ku Dios kier hasi mesun kos ku bo bida ta abo mester tuma e prome paso i Dios lo sigui hasi e sobra. Dios bendishona kada unu ku a tuma tempu pa lesa mi testimonio. Keda pendiente pa mas di lokual Dios a hasi den mi bida.
- Bonaire ligt dwars.
Min of meer hetzelfde onderwerp hebben:
Aantal keer gelezen: 219
